بنگلورو، 14 اپریل (یو این آئی) انڈین پریمیئر لیگ (آئی پی ایل) 2024 کے 30ویں میچ میں پیر کو رائل چیلنجرز بنگلور حیدرآباد سن رائزرز کو شکست دے کر اس سیزن میں اپنی دوسری جیت حاصل کرنے کے لیے میدان میں اترے گی۔ستاروں سے سجی بنگلورو کی ٹیم کو اس سیزن کی دوسری جیت حاصل کرنے کے لیے وراٹ کوہلی، فاف ڈو پلیسس، گلین میکسویل اور دنیش کارتک کی شاندار بلے بازی کے ساتھ ساتھ اس کے گیند بازوں کو بھی اپنی روانی دکھانا ہوگی۔ دونوں ٹیموں کے درمیان کھیلے گئے کل 23 میچوں میں سے رائل چیلنجرز بنگلور نے 10 جیتے ہیں جبکہ حیدرآباد سن رائزرز نے 12 میچ جیتے ہیں۔
ایک میچ برابر رہا۔ اس کے مطابق حیدرآباد کا ہاتھ اوپر ہے اور اس کے بلے باز بھی آئی پی ایل کے اس سیزن میں فارم میں ہیں۔اعدادوشمار کی بات کریں تو گزشتہ میچ میں کپتان فاف ڈو پلیسس (61)، رجت پاٹیدار (50)، دنیش کارتک (53) کی اننگز کی بنیاد پر بنگلورو نے 196 رنز کا بڑا اسکور کھڑا کیا لیکن اس کے گیند باز اسکور کا دفاع نہ کر سکے اور ممبئی انڈینس سات وکٹوں سے ہار گئی۔ اس سے قبل 6 اپریل کو بھی اس کے گیند باز وراٹ کوہلی کی سنچری اور فاف ڈو پلیسس کی شاندار اننگز کے بل بوتے پر بنائے گئے 183 رنز کے اسکور کا دفاع نہ کر سکے اور ٹیم راجستھان کے ہاتھوں چھ وکٹوں سے میچ ہار گئی۔ بنگلورو میں کولکتہ نائٹ رائیڈرز کے ساتھ کھیلے گئے میچ میں ٹیم نے وراٹ کوہلی کی 83 رنز کی ناٹ آؤٹ اننگز کی بنیاد پر 182 رنز بنائے۔ وہ یہ میچ بھی سات وکٹوں سے ہار گئے۔آر سی بی کی واحد جیت پنجاب کنگز کے خلاف کھیلے گئے میچ میں ہدف کا تعاقب کرتے ہوئے ملی۔
اس میچ میں وراٹ کوہلی نے 77 رنز کی اننگز کھیل کر ہدف کو آسان بنا دیا اور اس کے بعد دنیش کارتک نے شاندار بلے بازی کرتے ہوئے ہدف حاصل کر کے اپنی ٹیم کو پہلی جیت دلائی۔دوسری جانب سن رائزرز حیدرآباد نے گزشتہ میچ میں پنجاب کنگز کو دو رنز سے شکست دی تھی۔ میچ میں ایس آر ایچ نے پہلے بیٹنگ کرتے ہوئے 9 وکٹوں کے نقصان پر 182 رنز بنائے۔ نتیش کمار ریڈی نے ٹیم کے لیے سب سے زیادہ 64 رنز کی اننگز کھیلی۔ اس سے قبل کے میچ میں حیدرآباد نے شاندار بلے بازی اور باؤلنگ کا مظاہرہ کرتے ہوئے چنئی سپر کنگز کو چھ وکٹوں سے شکست دی تھی۔ جبکہ گجرات کے خلاف حیدرآباد کی کارکردگی خراب رہی اور اسے سات وکٹوں سے شکست کا منہ دیکھنا پڑا۔ کولکتہ کے خلاف قریبی میچ میں چار رنز سے شکست بھی ہوئی۔ حیدرآباد کے بلے باز ہینرک کلاسن (80)، ابھیشیک شرما (63) اور ٹریوس ہیڈ (62) نے ممبئی انڈینس کے خلاف 277 رنز کا بڑا اسکور بنایا اور میچ 31 رنز سے جیت لیا۔رائل چیلنجرز بنگلور چھ میچوں میں ایک جیت اور دو پوائنٹس کے ساتھ پوائنٹس ٹیبل میں 10 ویں نمبر پر ہے۔ وہیں سن رائزرس حیدرآباد پانچ میچوں میں تین جیت اور چھ پوائنٹس کے ساتھ پانچویں نمبر پر ہے۔ اسٹیڈیم کے ٹی۔ٹوئنٹی ریکارڈ کو دیکھتے ہوئے، جو بھی ٹیم یہاں ٹاس جیتے گی وہ ہدف بنانا چاہے گی۔ اس پچ پر پہلی اننگز کا اوسط اسکور 148 رنز ہے۔
