بھوپال، 11 مارچ (رپورٹر)بی جے پی اور کانگریس دونوں نے لوک سبھا انتخابات کے لیے اپنی تیاریاں تیز کر دی ہیں۔ دونوں جماعتیں اپنے امیدواروں کے انتخاب کے حوالے سے غور و خوض میں مصروف ہیں۔ اس سلسلے میں کانگریس الیکشن کمیٹی کی میٹنگ پیر کو دہلی میں مرکزی دفتر میں ہوئی۔ اس میں مدھیہ پردیش، راجستھان اور دیگر ریاستوں کے امیدواروں کے ناموں کو لے کر غور وخوض ہوا۔ مدھیہ پردیش میں کانگریس نے ایک درجن سے زیادہ ناموں کو منظوری دی ہے۔کانگریس کے قومی صدر ملکارجن کھڑگے، پارٹی کی سینئر لیڈر سونیا گاندھی اور دیگر لیڈروں نے سنٹرل الیکشن کمیٹی کی میٹنگ میں شرکت کی۔ مدھیہ پردیش سے 18 سے زیادہ سیٹوں کے ناموں پر بات ہوئی۔ جس میں سی ای سی میٹنگ میں 12 ناموں کی منظوری دی گئی ہے۔ اس میں چھندواڑہ کے نکول ناتھ کا نام بھی شامل ہے۔ سابق سی ایم کمل ناتھ نے پہلے ہی اعلان کر دیا تھا کہ نکول ناتھ چھندواڑہ سے الیکشن لڑیں گے۔سابق سی ایم کمل ناتھ اور دگ وجے سنگھ الیکشن نہیں لڑ رہے ہیں۔ دگ وجے سنگھ اس وقت راجیہ سبھا کے رکن ہیں۔ چھندواڑہ کے علاوہ پارٹی نے 11 سیٹوں کے لیے نام فائنل کیے ہیں۔ ان ناموں کا اعلان منگل کو کیا جا سکتا ہے۔پارٹی ذرائع کے مطابق بعض نشستوں کے ناموں پر اتفاق رائے نہیں ہوسکا ہے۔ اس وجہ سے ان کو ہولڈ کیا گیا ہے۔ بھنڈ سے پھول سنگھ بریا، بیتول سے رامو ٹیکام، راج گڑھ سے پریہ ورت سنگھ کے نام شامل ہیں۔ آپ کو بتا دیں کانگریس مدھیہ پردیش کی 29 میں سے 28 سیٹوں پر الیکشن لڑے گی۔ کانگریس نے کھجوراہو سیٹ سماج وادی پارٹی کو دی ہے۔
