بھوپال، 13 فروری (رپورٹر) مدھیہ پردیش حکومت آن لائن گیمنگ پر جی ایس ٹی وصول کرے گی۔ مرکزی حکومت نے اس پر 28 فیصد جی ایس ٹی لگایا ہے۔ ریاست میں دو بار مدھیہ پردیش گڈس اینڈ سروسز ٹیکس ایکٹ میں ترمیم کے لیے آرڈیننس لا چکی ہے۔ اب مدھیہ پردیش گڈس اینڈ سروس ٹیکس ترمیمی بل اسمبلی میں پاس ہو گیا ہے۔ کانگریس کے ارکان نے احتجاجاً واک آؤٹ کیا اور پھر ترمیمی بل کو صوتی ووٹ سے منظور کرلیا گیا۔
مدھیہ پردیش اسمبلی میں ایوان کی کارروائی منگل کو وقفہ سوالات سے شروع ہوئی۔ اس دوران آٹھ ارکان نے ایوان میں سوالات اٹھائے۔ اس کے بعد وزیر خزانہ جگدیش دیوڑا نے آن لائن گیمنگ پر 28 فیصد جی ایس ٹی لگانے کے لیے مختص بل 2024 پیش کیا۔ اس کی کانگریس ایم ایل اے رامنیواس راوت، ابھیجیت شاہ اور ابھے مشرا نے مخالفت کی۔ اپوزیشن لیڈر امنگ سنگھار نے الزام لگایا کہ حکومت جوئے اور سٹے بازی کو قانونی شکل دینے جا رہی ہے۔ دیگر اراکین اسمبلی کا کہنا تھا کہ آن لائن گیمنگ کو قانونی شکل دینے سے لوگ مزید آن لائن گیمز کھیلنے پر مجبور ہوں گے۔ یہ ٹھیک نہیں ہے۔اس کے جواب میں وزیر خزانہ نے کہا کہ جی ایس ٹی لگانے کا فیصلہ صرف آن لائن گیمنگ کی لت کو روکنے کے لیے کیا گیا ہے۔ اس پر کانگریس کے اراکین اسمبلی نے ہنگامہ کیا اور نعرے لگاتے ہوئے ایوان سے واک آوٹ کیا۔ اس دوران ایوان میں بل کی منظوری دے دی گئی۔ اس کے بعد ایوان کی کارروائی تین بجے تک ملتوی کر دی گئی۔
غور طلب ہے کہ اب تک جی ایس ٹی صرف آن لائن گیم کھیلنے والے سے ملنے والے کمیشن پر وصول کیا جاتا تھا، لیکن بل کی منظوری کے بعد اب گیمنگ سے ہونے والی آمدنی بھی ٹیکس کے دائرے میں آئے گی۔ حکومت نے اس سلسلے میں 27 جنوری کو ایک آرڈیننس جاری کیا ہے۔ اسمبلی میں بل پاس ہونے کے بعد اب یہ قانون بن چکا ہے۔
