نئی دہلی27جولائی: سماج وادی پارٹی کی راجیہ سبھا کی رکن کی جانب سے پیش کئے گئے پرائیویٹ بل پر ہونے والی ہنگامہ آرائی کے ایک دن بعد عام آدمی پارٹی کے راجیہ سبھا کے رکن سنجے سنگھ نے شدید ردعمل ظاہر کرتے ہوئے بی جے پی کو نشانہ بنایا۔ انہوں نے بی جے پی پر الزام لگایا کہ وہ ہمیشہ پسماندہ طبقات، دلتوں اور قبائلیوں کے خلاف تھی اور رہے گی۔ سنجے سنگھ نے کہا، ’’جس طرح سے بی جے پی کے ارکان پارلیمنٹ نے کل ایوان میں برتاؤ کیا وہ بی جے پی کا غیر اخلاقی رویہ ظاہر کر رہا ہے۔ کل صورتحال اس نہج پر پہنچ گئی تھی کہ ہمیں لگا کہ ایوان میں مار پیٹ کی نوبت آ جائے گی۔ اگر چیئرمین ایوان میں نہ ہوتے تو مجھے زدوکوب بھی کیا جا سکتا تھا۔انہوں نے کہا کہ ایس پی کی ایم پی کے او بی سی ریزرویشن بل لانے سے بی جے پی بہت ناراض ہے۔ ایس پی ایم پی نے پرائیویٹ ممبر بل کے ذریعے مطالبہ کیا تھا کہ او بی سی کو ان کی آبادی کے مطابق ریزرویشن ملنا چاہیے۔ اس بل پر بی جے پی نے اتنا ہنگامہ کیا کہ ایوان کو ایک گھنٹے کے لیے ملتوی کرنا پڑا۔ اس پر سنجے نے کہا، ’’جب تک میں ایوان میں ہوں، اپوزیشن پارٹی کے کسی رکن کے ساتھ ناانصافی نہیں ہونے دوں گا اور بولتا رہوں گا۔‘‘ عآپ کے ایم پی سنجے سنگھ نے ہفتہ کو کہا، ’’دلت برادری سے تعلق رکھنے والے کانگریس ایم پی نیرج دانگی (راجیہ سبھا میں) کے ساتھ جو کچھ بھی ہوا اس سے بی جے پی کا دلت مخالف اور قبائل مخالف چہرہ بے نقاب ہو گیا ہے۔ بی جے پی پسماندہ لوگوں سے اتنی نفرت کیوں کریت ہے؟ وہ ذات پر مبنی مردم شماری کیوں نہیں کرانا چاہتی؟‘‘
