میکے، 18 اگست (یو این آئی) پریا مشرا کی پانچ اور مننو منی (دو وکٹ) کی شاندار گیند بازی کی بدولت ہندوستان اے خواتین ٹیم نے اتوار کو کھیلے گئے تین میچوں کی سیریز کے تیسرے اور آخری میچ میں آسٹریلیا اے کو 171 رن سے شکست دے دی۔ ہندستانی ٹیم کے 244 رن کے ہدف کے تعاقب میں میدان میں اتری آسٹریلیا کی کوئی بھی بلے باز پچ پر نہ ٹھہر سکی۔ میڈی ڈارک نے سب سے زیادہ (22)، ٹیس فلنٹاف (20) اور چارلی ناٹ (11) رن بنائے۔ باقی ماندہ بلے بازوں میں سے کوئی بھی ڈبل فیگرز تک نہ پہنچ سکی اور آسٹریلیائی ٹیم 22.1 اوورز میں 72 کے اسکور پر سمٹ گئی۔ ہندوستانی ٹیم نے اپنے میچ میں اپنی طاقت کا مظاہرہ کیا ہے حالانکہ آسٹریلیا نے یہ سیریز 2-1 سے جیت لی ہے۔ انڈیا اے ویمنز ٹیم کی جانب سے پریا مشرا نے شاندار گیندبازی کا مظاہرہ کیا اور پانچ اووروں میں دو میڈنز کے ساتھ 14 رن کے عوض پانچ وکٹیں حاصل کیں۔
جبکہ منوں منی نے 2.1 اووروں میں چار رن دے کر دو وکٹیں حاصل کیں۔ سائکا اسحاق، سوپپاھنڈی یشاشری اور میگھنا سنگھ نے ایک ایک بلے باز کو آؤٹ کیا۔ اس سے قبل آسٹریلیا اے ویمنز ٹیم نے ٹاس جیت کر انڈیا اے ویمنز ٹیم کو پہلے بیٹنگ کی دعوت دی۔ بلے بازی کے لیے آئی ٹیم انڈیا کی شروعات اچھی نہیں رہی اور دوسرے ہی اوور میں شویتا سہراوت (0) پر پویلین لوٹ گئی۔ اس کے بعد کرن نوگیرے اور اوما چھتری نے اننگز کو سنبھالا۔ نوگیرے نے 23 گیندوں پر 25 اور اوما چھتری نے 16 رن بنائے۔ ایک وقت ٹیم انڈیا 43 رن پر تین وکٹ گنوا چکی تھی۔ اس کے بعد تیجل اور راگھوی بشٹ نے چوتھی وکٹ کے لیے 103 رن کی شراکت قائم کی۔ تیجل (50) اور راگھوی (53) نے اچھی اننگز کھیلی۔ سجیون سجنا نے 40 اور کپتان منو منی نے 34 رن بنائے۔ انڈیا اے ویمنز ٹیم نے 50 اووروں میں نو وکٹ پر 243 رن بنائے۔ آسٹریلیا اے ویمنز ٹیم کی جانب سے میٹلن براؤن نے تین وکٹیں حاصل کیں۔ نکولا ہینکوک اور چارلی ناٹ نے دو دو وکٹیں حاصل کیں۔ ٹیس فلنٹاف اور کیٹ پیٹرسن نے ایک ایک بلے باز کو آؤٹ کیا۔
